ឃាត់ខ្លួនជនសង្ស័យ២នាក់ជាជនជាតិចិន លួចរថយន្តពីខេត្តព្រះសីហនុមកលាក់ខ្លួន នៅភ្នំពេញ

ព្រះសីហនុ ៖ ដោយមានការ បញ្ជាផ្ទាល់ពី ឯកឧត្ដម ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ  និងមានការសម្របសម្រួលនីតិវិធីពីឯកឧត្តម សៀង សុខព្រះរាជអាជ្ញា នៃអយ្យការអមសាលាដំបូងខេត្តព្រះសីហនុ កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលក្រុងព្រះសីហនុ កម្លាំងជំនាញ នៃស្នងការដ្ឋាននគរបាលរាជធានី ភ្នំពេញ កម្លាំងអធិការដ្ឋាននគរបាលខណ្ឌ ច្បារអំពៅនិងកម្លាំងប៉ុស្តិ៍នគរបាលសង្កាត់ និរោធ ធ្វើការស្រាវជ្រាវយ៉ាងយកចិត្តទុក ដាក់ រហូតឈានដល់ចាប់ឃាត់ខ្លួន ជនសង្ស័យបានចំនួន០២នាក់ ជាជនជាតិចិន ភេទប្រុស ៖ ប្រត្តិបត្តការណ៍នេះធ្វើឡើងកាលពីថ្ងៃទី ២៥ ខែកញ្ញា ឆ្នាំ២០២៣ វេលា ម៉ោង០៣និង ៣០នាទី រសៀល ដោយដកហូតបានវត្ថុតាងរថយន្ត ដែលជនរងគ្រោះបាត់ តែជនសង្ស័យបានផ្លាស់ប្តូរផ្លាកលេខ រថយន្តទៅជាលេខ (ភ្នំពេញ 2AI-5090) ដើម្បីបន្លំភ្នែកសមត្ថកិច្ច ។

សូមរំលឹកថា ៖ កាលថ្ងៃទី២១ខែកញ្ញាឆ្នាំ២០២៣ វេលាម៉ោង១២និង៣០នាទីថ្ងៃត្រង់នៅ ចំណុច បុរីHILL PARK VILLA ស្ថិតនៅ ភូមិ៥ សង្កាត់៤ ក្រុងនិងខេត្តព្រះសីហនុ មាន ករណី ជនសង្ស័យមិនស្គាល់អត្ថសញ្ញាណ បានធ្វើសកម្មភាព លួចយករថយន្ត០១គ្រឿង ម៉ាក ALPHARD ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខ ភ្នំពេញ 2BG-7889 ដែលជនរងគ្រោះចតទុកនៅក្បែរផ្ទះ រួចជិះគេច ខ្លួនបាត់ស្រមោល ។

ជនរងគ្រោះមានឈ្មោះ ZHANG CHENDONG ភេទប្រុស អាយុ ២៧ឆ្នាំ ជនជាតិចិន មុខរបរបើកបររថយន្ត មានទីលំនៅ ភូមិ៥ សង្កាត់៤ ក្រុង–ខេត្តព្រះសីហនុ ។

សម្ភារបាត់បង់ រថយន្ត ០១គ្រឿង ម៉ាក ALPHARD ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខភ្នំពេញ 2BG-7889 ។

ចំណែកជនសង្ស័យទាំង០២នាក់រួមមាន៖

ទី១– ឈ្មោះ LIU HAI HUA ភេទប្រុស អាយុ ៣៩ឆ្នាំ ជនជាតិចិន មុខរបរនិងទីលំនៅ មិនពិតប្រាកដ ។

២–ឈ្មោះ LI XIAOJUN ភេទប្រុស អាយុ ៣៨ឆ្នាំ ជនជាតិចិន មុខរបរ និងទីលំនៅ មិនពិតប្រាកដ ។

វត្ថុតាងចាប់យក ៖ រថយន្ត ០១គ្រឿង ម៉ាក ALPHARD ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខភ្នំពេញ 2BG-7889 (ជាផលនៃអំពើចោរកម្ម) រថយន្ត ០១គ្រឿង ម៉ាក PRUIS ពណ៌ទឹកមាសពាក់ផ្លាកលេខ ភ្នំពេញ 2BC-2574 (មធ្យោបាយជិះប្រព្រឹត្តិបទល្មើស) និងផ្លាកលេខរថយន្ត ០២គូ ១–មានលេខៈ ភ្នំពេញ 2AB-7893 ២–លេខៈ ភ្នំពេញ 2AI-5090 ឧបករណ៍ផ្តាច់ប្រព័ន្ធGPSរថយន្ត០១គ្រឿង​ ឧបករណ៍​ថតចម្លងទិន្ន័យ សោររថយន្ត ០២គ្រឿង ឧបករណ៍ GPS ០១គ្រឿង ឧបករណ៍សប់ខ្យប់ សម្រាប់បើកទ្វាររថយន្ត ចំនួន០៥ ឧបករណ៍ចុចបំបែកកញ្ចក់រថយន្ត០១គ្រឿង ដែកសម្រាប់ទាក់បើកដៃទ្វាររថយន្ត ចំនួន ០១ ដង្កាប់ ០៣ដើម ម៉ាស៊ីនស្វាន ០១គ្រឿងទល់រឺវីស ០៣ដើម ពិលតូច ០២គ្រឿង សោរ  រថយន្ត ចំនួន០២ ស្រោមដៃ និងម៉ាសមួយចំនួន ។

បច្ចុប្បន្ន ជនសង្ស័យទាំង២នាក់រួមនិងវត្ថុតាង នគរបាលព្រហ្មទណ្ឌកម្រិតស្រាល កំពុងកសាងសំណុំរឿងដើម្បីបន្តនិតិវិធី ៕