ផ្ទុះអាវុធជាច្រើនគ្រាប់គំរាមអ្នកបើកឡានទំនើងរួចគេចខ្លួនបាត់ស្រមោល
ភ្នំពេញ ៖ បុរសម្នាក់បើករថយន្តសេរីទំនើបមួយគ្រឿងដេញបុកទៅលើយុវជនម្នាក់ពីក្រោយដែលកំពុងជិះម៉ូតូបណ្ដាលឲ្យដួលបោកទៅនិងថ្នល់រងរបួសធ្ងន់ ហើយបម្រុងថយមកកិនបន្ថែមទៀត ខណៈនោះក៏មានបុរសម្នាក់ ស្លៀកពាក់ស៊ីវិល ដែលបានឃើញហេតុការបានដកកាំភ្លើងខ្លីបាញ់ឡើងលើ៦គ្រាប់ដើម្បីគំរាម ទៅលើរថយន្តបង្ក ។
ហេតុការណ៍នេះកើតឡើងនៅវេលាម៉ោង២និង១០នាទី រំលងអធ្រាត្រ ឈានចូលថ្ងៃទី១០ ខែវិឆ្ឆិកា ឆ្នាំ២០១៨ត្រង់ចំណុចមុខផ្ទះលក់គ្រឿងបន្លាស់រថយន្ត(យីហោ សាម ឃុន)បណ្ដោយផ្លូវ៩៣ជិតផ្សារតូច ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
យុវជនរងគ្រោះដែលគេបើករថយន្តដេញបុកជិះម៉ូតូម៉ាក ឌ្រីមសង់២០១៥ ពណ៌ខ្មៅ ពាក់ស្លាកលេខភ្នំពេញ1FH-2579 ។ រីឯរថយន្តបង្ក មិនចាំអត្តសញ្ញាណ បានបើករត់គេចបាត់ស្រមោល ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញ យុវជនរងគ្រោះជិះម៉ូតូពីត្បូងទៅជើង លុះមកដល់ចំនុចកើតហេតុខាងលើ ស្រាប់តែមានរថយន្តទំនើបមួយគ្រឿងមិនចាំម៉ាកបើកពីក្រោយ ដេញបុកម៉ូតូជនរងគ្រោះ បណ្ដាលដួលម៉ូតូបោកទៅនឹងថ្នល់រងរបួសមធ្យម ។
សាក្សីបន្តថា បន្ទាប់មករថយន្តបង្កបម្រុងបើកថយក្រោយមកកិនជនរងគ្រោះបន្តែមទៀត ប៉ុន្តែសំណាងល្អបានបុរសម្នាក់កំពុងអង្គុយញាំអីនៅក្បែរនោះ បានឃើញហេតុការណ៍ដ៏អាក្រក់នេះ បានដកកាំភ្លើងបាញ់គំរាមឡើងលើ៦គ្រាប់ ធ្វើឲ្យរថយន្តបង្កបើករត់គេចខ្លួនពីកន្លែងកើតហេតុបាត់ស្រមោល។ ចំណែក បុរសដែលបានបាញ់គំរាមទៅរថយន្តបង្កក៏គេចខ្លួនចេញពីកន្លែងកើតបាត់ដែរ ។ ភ្លាមៗជនរងគ្រោះត្រូវបានរថយន្តគ្លីនិចឯជនដឹកយកទៅសង្គ្រោះភ្លាមៗ
ក្រោយកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុ រួចបានរើសសំបកគ្រាប់ និងបានយកម៉ូតូជនរងគ្រោះទៅរក្សាទុកនៅប៉ុស្តិ៍ស្រះចក រង់ចាំសាច់ញ្ញាតិយកឯកសារមកផ្ទៀងផ្ទាត់ប្រគល់ឲ្យទៅម្ចាស់វិញ ៕
