សាហាវណាស ! ក្រុមចោរដាវសាំមរ៉ៃ៤នាក់កាប់ជនរងគ្រោះដែលមានគ្នា៦នាក់ប្លន់យកម៉ូតូបានសម្រេចរួចគេចខ្លួនដោយសុវត្ថិភាព
ភ្នំពេញ៖ យុវជនប្រុសស្រី៦នាក់ នាំគ្នាអង្គុយ ក្បែអូតែលសុខា ដល់យប់ស្ងាត់ត្រូវជនសង្ស័យ១ក្រុមមានគ្នា៤នាក់ ប្រដាប់ដោយដាវសាំមរ៉ៃ៤ដើម បានធ្វើសកម្មភាពកាប់បណ្ដាលឲ្យរងរបួសរួចប្លន់យកម៉ូតូបានសម្រេច ជិះគេចខ្លួនបាត់ដោយសុវត្ថិភាព
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២ និង៤០នាទីរំលងអាធ្រាត ឈានចូលថ្ងៃទី១៦ ខែវិច្ឆិកា ឆ្នាំ២០១៨ នៅចំណុចក្បែរអូតេលសុខា ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ជនរងគ្រោះជាម្ចាស់មានឈ្មោះ ហេង ហម ភេទប្រុស អាយុ១៩ឆ្នាំ មុខរបប ជាងអគ្គិសនី ស្នាក់នៅកន្លែងធ្វើការក្នុងសង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិផ្ទះកណ្ដាល ឃុំផ្ទះកណ្ដាល ស្រុកស្រីសន្ធរ ខេត្តកំពង់ចាម ។ម៉ូតូដែលក្រុមចោរប្លន់យកនោះម៉ាកហុងដាឌ្រីម សេរី២០១៧ ពណ៌ខ្មៅ ពាក់ស្លាកលេខ ភ្នំពេញ 1GC-2306 ។
យោងតាមប្រភពព័ត៌មានពីមិត្តភ័ក្ត្រជនរងគ្រោះនៅកន្លែងកើតហេតុបានឲ្យដឹងថា នៅមុនពេលកើតហេតុ ពួកគេមានគ្នាប្រុសស្រី៦នាក់ ទាំងជនរងគ្រោះ បានជិះម៉ូតូ២គ្រឿងឌុបគ្នាមកពីម្ដុំទឹកថ្លា ហើយមកអង្គុយលេងនៅកន្លែងកើតហេតុ។ ខណៈដែលអង្គុយលេងបានមួយសន្ទុះ ស្រាប់តែមានជនសង្ស័យ៤នាក់ជិះម៉ូតូមួយគ្រឿងម៉ាកឡេត មិនចាំស្លាកលេខ ប្រដាប់ដោយដាវសាំមរ៉ៃ៤ដើម មកដល់ធ្វើសកម្មភាពកាប់ទៅលើជនរងគ្រោះម្នាក់ ក្នុងចំណោម៦នាក់ បណ្ដាលឲ្យត្រូវចំដៃហូរឈាម តែមិនធ្ងន់ធ្ងរ ធ្វើឲ្យក្រុមជនរងគ្រោះភ័យស្លន់ស្លោនាំគ្នារត់ចេញពីកន្លែងកើតហេតុទាំងមិនបានដកសោរម៉ូតូ ឃើញឱកាសល្អក្រុមជនសង្ស័យបានយកម៉ូតូជនរងគ្រោះជិះគេចខ្លួនបាត់ស្រមោល ។
ក្រោយពេលកើតហេតុ ជនរងគ្រោះបានត្រឹមតែនាំគ្នាទៅដាក់ពាក្យបណ្ដឹងនៅប៉ុស្ដិ៍នគរបាលជ្រោយចង្វារ ដើម្បីឲ្យសមត្ថកិច្ចតាមដានស្រាវជ្រាវមុខសញ្ញា និងចាប់ជនសង្ស័យទាំងនោះមកផ្ដន្ទាទោសតាមផ្លូវច្បាប់ ៕
