ឆ្លងភ្លើងអាគុយឆេះរថយន្តក្នុងយានដ្ឋានជួសជុលរថយន្តផ្អើលសមត្ថកិច្ចថ្ងៃអុំទូកទី២
ភ្នំពេញ៖ អគ្គីភ័យឆាបឆេះយានដ្ឋានជួសជុលរថយន្តមួយកន្លែងផ្អើលសមត្ថកិច្ច និងកម្លាំងអន្តរាគមន៍បង្កានិងពន្លត់អគ្គីភ័យចេញរថយន្តពន្លត់អគ្គីភ័យទាំងថ្ងៃ ៖ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២ថ្ងៃត្រង់ចំថ្ងៃបុណ្យអុំទូកទី២ថ្ងៃ២២រខែវិច្ឆិការឆ្នាំ២០១៨ នៅតាមបណ្ដោយផ្លូវបេតុង ភូមិទួលពង្រ សង្កាត់ចោមចៅ១ ខណ្ឌពោធិសែនជ័យ រាជធានីភ្នំពេញ ។
ទីតាំងយានដ្ឋានជួសជុលរថយន្តខាងលើទំហំ១០X២០ម៉ែត្រ ប្រកស័ង្កសី មានម្ចាស់ឈ្មោះ ហេង គឹមសន ភេទប្រុស អាយុ៥១ឆ្នាំ រស់នៅផ្ទះកើតហេតុ ។
បើតាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ ខណៈដែលនៅសុខៗ ស្រាប់តែផ្សែងហុយខ្មួលខ្មាញ់ចេញពីរថយន្ត២៤កៅអី មួយគ្រឿងដែលចតទុកក្នុងយានដ្ឋាន ហើយបានចេញជាអណ្តាតភ្លើង ឆេះរាលដាល ដល់សម្ភារៈក្បែរខាង បង្កឲ្យភ្ញាក់ផ្អើល ដល់ប្រជាពលរដ្ឋនិងសមត្ថកិច្ច ចេញរថយន្តពន្លត់អគ្គីភ័យចំនួន៥គ្រឿងរបស់ស្នងការក្រុង៤គ្រឿង អាវុធហត្ថ ១គ្រឿង មកដល់ជួយអន្តរាគមន៍ បាញ់ពន្លត់អស់ទឹកមួយឡាន ទើបរលត់ទៅវិញ តែរថយន្តទេសចរណ៍២៤កៅអី មួយគ្រឿងឆេះខ្ទេច សល់តែដែក សំណាងល្អមិនឆាបឆេះរាលដល់ផ្ទះហើយក៏មិនបង្កឲ្យអ្នកណារងរបួសដែរ ។ ដោយឡែកសម្ភារៈខូចខាតក្នុងឧប្បត្តិហេតុខាងលើនេះរួមមាន៖ រថយន្តមួយគ្រឿង ប្រភេទទេសចរណ៍២៤កៅអី ម៉ូតូ មួយគ្រឿង កង់ មួយគ្រឿង និងសម្ភារៈមួយចំនួនទៀត ។
តាមសមត្ថកិច្ច ពិនិត្យជាក់ស្តែង អគ្គីភ័យខាងលើផ្តើមចេញពី ឆ្លងភ្លើងក្បាលអាគុយ របស់រថយន្ត ២៤កៅអីទើបបណ្ដាលទៅជាអគ្គីភ័យកើតឡើងបែបនេះ ។ ចុងក្រោយសមត្ថកិច្ចបានសូមណូមពរដល់បងប្អូនប្រជាពលរដ្ឋសូមមានការប្រុងប្រយត្ន័ឲ្យបានខ្ពស់ចំពោះអគ្គីភ័យ ព្រោះនេះជារដូវក្ដៅ ៕
