ជិះម៉ូតូទៅទិញសាច់ក្លែមប៉ះគ្នាបន្តិចបន្តួចវាយតប់គ្នាបណ្តាលឲ្យបុរសម្នាក់របួសធ្ងន់លុះព្រឹកឡើងយកទៅពេទ្យទើបដឹងថាស្លាប់
ភ្នំពេញ ៖ បុរសម្នាក់ជិះម៉ូតូប៉ះគ្នាបន្តិចបន្តួចឈ្លោះប្រកែកក្លាយជាអំពើហឹង្សាវាយតបគ្នាបណ្ដាលឲ្យរបួសធ្ងន់សន្លប់ស្ដូកស្ដឹងកាលពីវេលាម៉ោងជិត១១យប់ថ្ងៃទី០២ខែឧសភាឆ្នាំ២០១៨នៅតាមបណ្ដោយផ្លូវបេតុងផ្សារក្រមួនភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ បន្ទាប់មកត្រូវបានបងប្អូនលើកយកទៅដេកនៅផ្ទះ លុះព្រឹកឡើងប្រពន្ធឆ្ងល់ដេកមិនងើបក៏បានប្រញ៉ាប់ប្រញ៉ាល់ដឹកតាមរឺម៉កកង់បីយកទៅពេទ្យទើបដឹងថាប្ដីស្លាប់ បង្កការភ្ញាក់ផ្អើលកាល ពីវេលាម៉ោង៧និង៥០នាទីព្រឹកថ្ងៃទី៣ខែឧសភាឆ្នាំ២០១៨ ។
សពជនរងគ្រោះមានឈ្មោះ ស្រ៊ុន វិចិត្រ ភេទប្រុស អាយុ ៣៦ឆ្នាំ មុខរបរជាងពិដាន ស្នាក់នៅភូមិទួលរការ៣ សង្កាត់ចាក់អង្រែក្រោម ខណ្ឌមានជ័យ និងមានស្រុកកំណើតនៅស្រុងកងមាស ខេត្តកំពង់ចាម មានប្រពន្ឋមានឈ្មោះ តឿង ឡេន អាយុ ៣៥ឆ្នាំមុខរបរ កម្មការិនីរោងចក្រ។ ចំណែកជនសង្ស័យ មានឈ្មោះ ម៉េង ភារៈ ហៅវួច ភេទប្រុស អាយុ ២៧ឆ្នាំ មុខរបររត់តុការ នៅម៉ូឌែន២ សង្កាត់ចាក់អង្រែក្រោម ខណ្ឌមានជ័យ ។
បើតាមប្រភពពីប្រពន្ធជនរងគ្រោះបានប្រាប់អ្នកសារព័ត៌មានឲ្យដឹងថាមុនកើតហេតុប្ដីរបស់គាត់បានជិះម៉ូតូស្កុបពី ពណ៌ក្រហមមួយគ្រឿង ឌុបបងថ្លៃប្រុសទៅទិញគ្រឿងក្លែមហើយពេលត្រលប់មកវិញក៏បានកៀរគ្នាជាមួយម៉ូតូវីវ៉ាពណ៌ខ្មៅតែមិនខូចខាតនិងរបួសធ្ងន់ធ្ងរនោះទេ ហើយក៏សម្របសម្រួលគ្នាបញ្ចប់រឿងតែពេលប្ដីគាត់ជិះម៉ូតូមកដល់ផ្ទះមិនដឹងមូលហេតុអី ប្ដីគាត់ទៅកន្លែងកើតហេតុមិនឆ្ងាយប៉ុន្មានពីផ្ទះក៏មានបុរស មួយក្រុម មិនចាំថាប៉ុន្មាននាក់ បានយកដុំថ្មនិងបំពង់ទីបវាយប្ដីគាត់បណ្ដាលឲ្យសន្លប់ស្ដូកស្ដឹង ភ្លាមៗក៏មានប្រជាពលរដ្ឋនៅក្បែកន្លែងកើតហេតុស្រែកឆោឡោជួយឃាត់កុំឲ្យវាយគ្នាពេលនោះក៏ក្រុមជនបង្កនាំគ្នារត់គេចខ្លួនបាត់អស់បន្ទាប់មកដោយពេលនោះមិនឃើញស្នាមរបួសអ្វីលើខ្លួន ប្រាណសូម្បីតែឈាមក៏គ្មានសង្ស័យថា ប្ដីគាត់ស្រវឹងខ្លាំង ពេកក៏បានលើកយកមកដេកនៅផ្ទះលុះព្រឹកឡើងឃើញប្ដីមានសភាពមិនដឹងខ្លួនបានហៅបងថ្លៃយករឺម៉កកង់បីដឹកទៅ ពេទ្យ ទើបពេទ្យប្រាបថាប្ដីគាត់បានស្លាប់បាត់ ទៅហើយ ។
ក្រោយមកដោយឃើញស្នាមជាំពេញខ្លួនសង្ស័យថាមកពីករណីអំពើហឹង្សាកាលពីយប់ក៏បានដឹកសពជនរងគ្រោះទៅតម្កល់នៅវត្តចាក់អង្រែក្រោមរួចបានទៅដាក់ពាក្យបណ្ដឹងនៅប៉ុស្តិនគរបាលចាក់អង្រែក្រោម ភ្លាមៗសមត្ថកិច្ចបានចុះទៅពិនិត្យនិងធ្វើកោសល្យវិច្ឆ័យ បញ្ជាក់ថាស្នាមជាំដោយសារវាយ រួចក៏ប្រគល់សពជនរងគ្រោះឲ្យទៅក្រុមគ្រួសារយកទៅស្រុកកំណើតធ្វើបុណ្យតាមប្រពៃណី ។ ចំណែកក្រុមជនសង្ស័យសមត្ថកិច្ច ត្រូវបានសមត្ថកិច្ចឃាត់ខ្លួនបានម្នាក់បន្ទាប់ពីប្រពន្ធជនរងគ្រោះមកប្ដឹង បច្ចុប្បន្នកំពុងឃុំខ្លួននៅអធិការនគរបាលខណ្ឌមានជ័យ និងកសាងសំណុំរឿងដើម្បីចាត់ការបន្តតាមនិតិវិធីច្បាប់ ។ ចំណែក បក្ខពួកសមត្ថកិច្ចស្រាវជ្រាវតាមចាប់ខ្លួនបន្តទៀត ៕
