រន្ធត់ណាស់!យុវជន២នាក់ជួបគ្រោះចរាចរណ៍ស្លាប់យ៉ាងអាណោចអធម៌ និងម្នាក់ទៀតរបួសធ្ងន់
ភ្នំពេញ៖ រថយន្តទូរីសបើកលឿនវ៉ាជែងជ្រុលទៅបុកជាមួយម៉ូតូnexបណ្ដាលឲ្យយុវជន២នាក់ស្លាប់ភ្លាមៗនៅកន្លែង ចំណែកម្នាក់ទៀតរងរបួសធ្ងន់ ៖ ហេតុការណ៍គ្រោះថ្នាក់ចរាចរណ៍គួរឲ្យរន្ធត់នេះបានកើតឡើងកាលពីវេលាម៉ោង ៥និង២៥នាទីព្រឹកថ្ងៃទី២៤ខែវិច្ឆិកាឆ្នាំ២០១៨ នៅតាមបណ្ដោយផ្លូវព្រះនរោត្ដម ត្រង់ចំនុចមុខ ( គ្រឹះស្ថានមីក្រូហិ រញ្ញវត្ថុ ប៊ី អេន ខេសុី ) ស្ថិតក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ ។
សពយុវជនរងគ្រោះដែលស្លាប់២នាក់រួមទាំងអ្នករងរបួសធ្ងន់មិនទាន់បានស្លាល់អត្តសញ្ញាណ នៅឡើយទេ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តទូរីស ពណ៌សមួយគ្រឿងពាក់ស្លាកលេខភ្នំពេញ2AB-9170បើកបរដោយបុរសម្នាក់ធ្វើដំណើរតាមបណ្ដោយផ្លូវព្រះនរោត្ដមទិសដៅពីត្បូងទៅជើងក្នុងល្បឿនយ៉ាងលឿនខណៈមកចំនុចកើតហេតុក៏បានវ៉ាជែងរថយន្តមួយគ្រឿងទៀតបណ្ដាលឲ្យជ្រុលទៅបុកជាមួយម៉ូតូnexពណ៌ស ពាក់ស្លាកលេខភ្នំពេញ1CL-4344ដែលជិះគ្នា៣នាក់បើកបរបញ្ច្រាស់ទិសដៅគ្នាយ៉ាងពេញទំហឹង បណ្ដាលឲ្យយុវជន២នាក់បានបោកក្បាលស្លាប់ភ្លាមៗនៅនិងកន្លែងកើតហេតុចំណែកម្នាក់ទៀតរបួសធ្ងន់ធ្ងរត្រូវបានរថយន្តសាមុយដឹកទៅសង្គ្រោះបន្ទាន់នៅមន្ទីរពេទ្យ ។ ចំណែកអ្នកបើករថយន្តត្រូវបានបុរសម្នាក់ដែលឃើញហេតុការណ៍ដេញតាមចាប់បានប្រគល់ឲ្យសមត្ថកិច្ច នគរបាលប៉ុស្តិបឹងកេងកង១ ។ ដោយឡែកម៉ូតូនិងរថយន្តបានរងការខូចខាតយ៉ាងដំណំ ។
ក្រោយពេលកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញរងចាំដោះស្រាយនៅពេលក្រោយ ។ ចំណែកសពជនរងគ្រោះទាំង២នាក់សមត្ថកិច្ចដឹក យកទៅតម្កល់នៅវត្ថទឹកថ្លាដើម្បីស្រាវជ្រាវរកសាច់ញាតិ ដើម្បីប្រគល់ឲ្យយកទៅបុណ្យតាមប្រពៃណី ៕
