គួរឲ្យអាសូរណាស់! ក្មេងស្រី២នាក់បងប្អូនលង់ទឹកប្រឡាយស្លាប់យ៉ាងអាណោចអធម៌
កណ្ដាល៖ ក្មេងស្រី២នាក់បងប្អូនដើរទៅតាមម្ដាយមីងទៅស្រែ ចុះលេងទឹកប្រឡាយលង់ស្លាប់ទាំង២នាក់បងប្អូនយ៉ាងអណោចអធម៌ ៖ ហេតុការភ្ញាក់ផ្អើលនេះបានកើតឡើងនៅវេលាម៉ោង៨និង៣០នាទីព្រឹកថ្ងៃទី១០ ខែធ្នូ ឆ្នាំ២០១៨ នៅចំណុចប្រឡាយទឹកជម្រៅប្រហែល២ ម៉ែត្រ ភូមិទួលសេរី ឃុំទួលព្រេជ ស្រុកអង្គស្នួល ខេត្តកណ្តាល។
ក្មេងស្រីរងគ្រោះទាំង២នាក់ទី១/មានឈ្មោះ ប៉ិច រក្សា ភេទស្រីអាយុ៩ឆ្នាំ
ទី២/ឈ្មោះ ប៉ិច រម្យនា ភេទស្រីអាយុ៤ឆ្នាំ អ្នកទាំង២ជាបងប្អូនបង្កើត មានម្ដាយឈ្មោះ ឡាង ប៊ុនណាង ភេទស្រី អាយុ២៨ឆ្នាំ មុខរបរ សំអាងការ មានទីលំនៅភូមិអន្ទង់ក្រវៀន ឃុំម្កាក់ ស្រុកអង្គស្នួល ខេត្តកណ្ដាល ។
បើតាមការរៀបរាប់របស់ម្ដាយក្មេងស្រីរងគ្រោះបានឲ្យដឹងថា រូបគាត់និងប្ដីបានយកកូនស្រីទាំង២នាក់ទៅផ្ញើឪពុកម្តាយ នៅភូមិទួលសេរី ឃុំទួលព្រេជស្រុកអង្គស្នួល រយៈពេល៣ថ្ងៃហើយដោយសារខ្លួនជាប់រវល់ ដើរភ្នួងគេទាំង២នាក់ប្តី លុះដល់ថ្ងៃទី១០ខែធ្នូ ម៉ោងប្រហែល៨និង១០នាទីព្រឹកស្រាប់តែប្អូនស្រីខាងប្ដីរបស់គាត់បានទូរសព្ទ័ប្រាប់ថា កូនស្រីរបស់គាត់បានលង់ទឹកស្លាប់ទាំង២នាក់ ។
