តារាកំប្លែងល្បីឈ្មោះនាយកុយ និងនាយក្រិន ជួបគ្រោះថ្នាក់ចរាចរណ៍ នៅខេត្តត្បូងឃ្មុំ
ត្បូងឃ្មុំ៖ តារាកំប្លែងលោក ជួង ជី ហៅ(នាយកុយ)និងនាយក្រិន បានជួបគ្រោះថ្នាក់ចរាចរណ៍ដោយសាររថយន្តបែកកង់រេចង្កូតទៅបុកដើមឈើ
គ្រោះថ្នាក់ចរាចរណ៍បានកើតឡើងកាលពីវេលាម៉ោង០៥និង៥០នាទីព្រឹកថ្ងៃទី២០ខែមករាឆ្នាំ២០១៩ នៅតាមបណ្ដោយផ្លូវលេខ៧៣ ភូមិថ្នល់ ឃុំតំបែរ ស្រុកតំបែរ ខេត្តត្បូងឃ្មុំ ។
លោកឧត្តមសេនីយ៍ បែន រ័ត្ន ស្នងការខេត្តត្បូងឃ្មុំ បានឲ្យដឹងថា ហេតុការណ៍គ្រោះថ្នាក់ចរាចរណ៍នេះ បណ្ដាលមកពីរថយន្ត ម៉ាកឡង់គ្រីស័រ ពណ៌ស ពាក់ផ្លាកលេខភ្នំពេញ2AR-9968 បែកកង់រេចង្កូតទៅបុកដើមឈើ ។
លោកឧត្តមសេនីយ៍ បែន រ័ត្ន បានបញ្ជាក់ទៀតថា រថយន្ដនេះបើកបរដោយឈ្មោះ ជួង ជី (ហៅនាយកុយ) អាយុ៦៤ឆ្នាំ រស់នៅរាជធានីភ្នំពេញ រងរបួសកែងដៃស្តាំ និងអ្នករួមដំណើរឈ្មោះ ទេស សុជន (នាយក្រិន) អាយុ៣៩ឆ្នាំ រស់នៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ដោយជនរងគ្រោះទាំងពីរធ្វើដំណើរ មកពីខេត្តរតនគរី ទៅរាជធានីភ្នំពេញ៕
