ចោរ២នាក់ឆក់ការបូបបានសម្រេចរត់គេចសមត្ថកិច្ចឡើងខុនដូជាន់ទី៧លោតមកក្រោមបែកក្បាលស្លាប់ម្នាក់និងម្នាក់ទៀតសមត្ថកិច្ចចាប់វាយខ្នោះ
ភ្នំពេញ ៖ ជនសង្ស័យម្នាក់លោតពីលើអាគាជាន់ទី៧បែកក្បាលបាក់កស្លាប់និងម្នាក់ទៀតត្រូវកម្លាំងសមត្ថកិច្ចចាប់វាយខ្នោះ បន្ទាប់ពីពួកគេទាំង២នាក់ធ្វើសកម្មភាពឆក់ការបូបពីជនបរទេស
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០១និង០០នាទីរសៀលថ្ងៃទី៤ ខែកុម្ភៈ ឆ្នាំ២០១៩ នៅខុនដូរមួយកន្លែងស្ថិតនៅតាមបណ្ដោយផ្លូវលេខ១២៣ សង្កាត់បឹងត្របែក ខណ្ឌចំការមន រាជធានីភ្នំពេញ ។
បើតាមសមត្ថកិច្ចបានឱ្យដឹងថា មុនពេលកើតហេតុកម្លាំងសមត្ថកិច្ចរបស់ អធិការដ្ឋាននគរបាល ខណ្ឌចំការមនបានចុះល្បាតពួនស្ទាក់ក្នុងមូលដ្ឋានដើម្បីការពារសុខសុវត្ថិភាពជូនប្រជាពលរដ្ឋក្នុងរដូវចូលឆ្នាំចិន-វៀតណាម ពេលដែលទទួលព័ត៌មានថាមានក្រុមចោរឆក់កាបូបពីជនបរទេស បានសម្រេច ភ្លាមៗនោះកម្លាំងអន្តរាគមន៍ខណ្ឌចំការមនសហការណ៍ជាមួយ នឹងកម្លាំងប៉ុស្តិ៍នគរបាលរដ្ឋបាលបឹងត្របែកបានដេញប្រផិតប្រភីងឃាត់ខ្លួនបានជនសង្ស័យម្នាក់ចំណែកជនសង្ស័យម្នាក់ទៀត ព្យាយាមរត់គេចសមត្ថកិច្ចផ្លោះចូលក្នុងខុនដូជាន់ទី៧ ហើយកម្លាំងសមត្ថកិច្ចបានឡោមពទ្ធ័ដើម្បីចូលទៅចាប់ជនសង្ស័យ ខណៈពេលដែលជនសង្ស័យបានឃើញសមត្ថកិច្ចមានការភិតភ័យបានលោតចុះពីជានទី៧ធ្លាក់ចុះមកលើដំបូលផ្ទះប្រជាពលរដ្ឋដែលនៅក្បែរហើយក៏បែកក្បាលហូរឈាមតាមស្លឹកត្រចៀកស្លាប់ភ្លាមៗនៅនិងកន្លែងតែម្ដង ។
ក្រោយពេលកើតហេតុសមត្ថកិច្ចខណ្ឌចំការមនបានចុះទៅពិនិត្យសពជនសង្ស័យនិងធ្វើកំណត់ហេតុនិងដឹកយកទៅតម្កល់ទុកនៅវត្តដើម្បីស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី។ ចំណែកជនសង្ស័យម្នាក់ទៀតត្រូវបញ្ជួនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌចំការមនដើម្បីកសាងសុំនុំរឿងបញ្ជូនទៅតុលាការចាត់ការតាមនីតិវិធី៕
