សមត្ថកិច្ចឃាត់ខ្លួនជនជាតិរ៉ូម៉ានី និងគ្រឿងញៀនជិត៥គីឡូនៅព្រលានយន្តហោះខេត្តសៀមរាប
សៀមរាប៖ នគរបាលការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តសៀមរាប សហការជាមួយកម្លាំងសមត្ថកិច្ចពាក់ព័ន្ធឃាត់ខ្លួនជនជាតិរ៉ូម៉ានីម្នាក់ បន្ទាប់ពីសង្ស័យថារត់ពន្ធគ្រឿងញៀនឆ្លងដែនជិត ៥គីឡូក្រាម។ ហេតុការណ៍ឃាត់ខ្លួននេះបានធ្វើឡើងកាលពីវេលាម៉ោង៩និង៥៥នាទីព្រឹកថ្ងៃទី០៦ខែកុម្ភៈ ឆ្នាំ២០១៩។
នគរបាល បានអោយដឹងថា ជនជាតិរ៉ូមោនីរូបនេះមានឈ្មោះ OLARU NARCIS-MANUEL ត្រូវចេញដំណើរទៅទីក្រុងហុងកុង ប្រទេសចិន តាមជើងហោះហើរលេខ KA-249 (REP-HKG)។
យោងតាមការត្រួតពិនិត្យ និងធ្វើតេស្តិ៍បឋម ជាមួយកម្លាំងសមត្ថកិច្ចពាក់ព័ន្ធ រកឃើញសារធាតុក្រាមពណ៌ស ដែលសាមីខ្លួនបានដាក់ក្នុងកញ្ចប់ថង់ប្លាស្ទីក រាងសំប៉ែត ០៤ជ្រុង ចំនួន០៤ លាក់ទុកក្នុងបាតកាបូបស្ពាយខ្នង ចំនួន ០៤ផ្សេងងគ្នា ដែលជាប្រភេទគ្រឿងញៀន មេតំហ្វេតាមីន ដែលមានទម្ងន់ប្រមាណ ៥,០២០ក្រាម។
បច្ចុប្បន្នជនសង្ស័យ និងវត្ថុតាង ត្រូវបានឃាត់ខ្លួន ប្រគល់ជូនកម្លាំងស្នងការដ្ឋាននគរបាលខេត្តសៀមរាប ដើម្បីចាត់ការទៅតាមនីតិវិធី៕