សមត្ថកិច្ចដោះលែងឲ្យមានសេរីភាពវិញ៣១១នាក់នៅ៤នាក់ទៀតកសាងសំណុំរឿងបញ្ជួនទៅតុលាការ
ភ្នំពេញ៖ បើយោងតាមសេចក្ដីរាយការណ៍បឋមបានឲ្យដឹងថា យុវជន-យុវនារីជាង៣០០នាក់ដែលសមត្ថកិច្ចឃាត់ខ្លួននៅមជ្ឍមណ្ឌលកម្សាន្តរ៉ុក ត្រូវបានដោះលែងវិញដើម្បីឲ្យអាណាព្យាបាលយកទៅអប់រំ នៅសល់តែ៤នាក់តែប៉ុណ្ណោះដែលជាប់ពាក់ព័ន្ធករណីសមត្ថកិច្ចចុះបង្ក្រាបទីតាំងក្លឹបកម្សាន្ដ រ៉ុក ។
សមត្ថកិច្ចបានឲ្យដឹងថា កាលពីយប់ថ្ងៃទី២៤ កុម្ភៈ ឆ្នាំ២០១៩លោកស្នងការ នគរបាលរាជធានីភ្នំពេញបានអនុញ្ញាតិឲ្យមនុស្សជាង៣០០នាក់បានត្រឡប់ទៅផ្ទះវិញហើយដោយមានការឯកភាពពីលោកព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញផងដែរ ។
សមត្ថកិច្ចបានឲ្យដឹងទៀតថា មនុស្សជាង២០០នាក់នោះមាន២៣៧នាក់ជាប់ពាក់ព័ន្ធប្រើប្រាស់គ្រឿងញៀន (ដែលហៅថា ជាជនរងគ្រោះ) និង៧០នាក់ជាយុវជនស្អាតស្អំមិនជាប់ពាក់ពន្ធគ្រឿងញៀននោះទេ តែត្រូវឃាត់ខ្លួនក្នុងរង្វង់ប្រតិបត្តិការ ។ រហូតដល់វេលាថ្ងៃត្រង់ថ្ងៃទី២៥ខែកុម្ភៈឆ្នាំ២០១៩នេះ នៅសល់តែ៤នាក់ទេ កំពុងសាកសួរបន្ថែមទៀតនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្ដតាមនីតិវិធី ។
សូមជម្រាបថា ករណីបង្ក្រាបគ្រឿងញៀនដ៏ទ្រង់ទ្រាយធំដែ់លធ្វើឡើងនៅក្នុងមជ្ឍមណ្ឌលកម្សាន្តរ៉ុកនេះ សមត្ថកិច្ចបានបង្ហើបឲ្យដឹងថា ពាក់ព័ន្ធម្ចាស់ទីតាំងសមត្ថកិច្ចនៅមិនទាន់កំណត់បានមុខសញ្ញានៅឡើយទេ ព្រោះអត់មានចម្លើយណាឆ្លើយដាក់ ។ សមត្ថកិច្ចក៏បានសម្រេចចិត្តឲ្យម្ចាស់ម៉ូតូទៅយកម៉ូតូវិញដែលបានឃាត់ទុកនៅមជ្ឈមណ្ឌល កម្សាន្តរ៉ុក ប៉ុន្តែតម្រូវលក្ខខណ្ឌឲ្យមានកាតគ្រីសម្គាល់យានយន្ត និងអត្តសញ្ញាណប័ណ្ណត្រឹមត្រូវទើបប្រគល់ឲ្យវិញ ៕
