ឆេះព្រៃក្បែរស្ពានអាកាស៧មករាផ្អើលដល់សមត្ថកិច្ចចុះអន្តរាគមន៍ទាំងយប់
ភ្នំពេញ៖ សំរាម និងព្រៃឈើក្នុងដីឡូត៍មួយកន្លែងសង្ស័យក្មេងស្ទាវញៀនថ្នាំលួចដុតបណ្ដាលឲ្យឆាបឆេះសន្ធោសន្ធៅ បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះអន្តរាគមន៍កាលពីវេលាម៉ោង១០និង២០នាទីយប់ថ្ងៃទី០១ខែមិនាឆ្នាំ
២០១៩ ស្ថិតនៅក្បែរស្ពានអាកាស៧មករា តាមបណ្ដោយផ្លូវសហព័ន្ធរុស្សុី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
បើតាមប្រភពពីប្រជាពលរដ្ឋបានប្រាប់ឲ្យដឹងថា មុនពេលកើតហេតុគេបានឃើញផ្សែងហុយនិងមានអណ្ដាតភ្លើងឆាបឆេះចេញពីព្រៃឈើដែលស្ថិតក្នុងដីឡូតិ៍ក្បែរផ្លូវសហព័ន្ធរុស្សីខាងក្រោយហាងលក់រថយន្ត១៦៨ រួចក៏មានការភ្ញាក់ផ្អើលនិងបាននាំគ្នាយកទុយោទឹកមកបាញ់ពន្លត់ តែភ្លើងកាន់តែឆេះខ្លាំងទៅៗ ទើបទំនាក់ទំនងទៅសមត្ថកិច្ចមូលដ្ឋានចេញរថយន្ដពន្លត់អគ្គីភ័យមកជួយអន្តរាគមន៍បាញ់ពន្លត់ទើបរលត់ទៅវិញ។ចំពោះករណីខាងលើនេះមិនមានអ្នកណាម្នាក់រងរបួសនោះទេ។
ក្រោយកើតហេតុ សមត្ថកិច្ចមូលដ្ឋានបានត្រួតពិនិត្យឃើញខូចខាតខ្សែភ្លើងនិងព្រៃឈើរបស់បងប្អូនប្រជាពលរដ្ឋនៅកន្លែងកើតហេតុជាច្រើន តែបើកសិនរថយន្ដពន្លត់អគ្គីភ័យមកជួយអន្តរាគមន៍មិនទាន់ពេលវេលាទេ និងអាចរៀងដាលឆេះដល់ផ្ទះប្រជាពលរដ្ឋជាក់ជាមិនខាន។ ដោយឡែកករណីនេះមានគេសង្ស័យថា ត្រូវក្រុមក្មេងស្ទាវលួចដុត ៕
