ផ្លូវល្បឿនលឿនដំបូងគេនៅកម្ពុជា គ្រោងនឹងបេីកការដ្ឋានសាងសង់នៅថ្ងៃទី២២ខែមីនាឆ្នាំ២០១៩ខាងមុខនេះ
ភ្នំពេញ៖ ផ្លូវល្បឿនលឿនភ្នំពេញ-ព្រះសីហនុ គ្រោងសាងសង់ជាបួនគន្លង ដោយ២គន្លងទៅ ២គន្លងមក ខណ្ឌដោយសួរច្បារកណ្ដាលទ្រូងផ្លូវមានប្រវែងសរុបជិត២០០គីឡូម៉ែត្រ ទទឹង២៤ម៉ែត្រ ក្រាលកៅស៊ូ AC ហើយមានកសាងរបងបាំងសងខាងផ្លូវដើម្បីការពារសុវត្ថិភាពជូនអ្នកធ្វើដំណើរផងដែរ។ ផ្លូវល្បឿនលឿននេះគ្រោងប្រើពេលសាងសង់ ៤ឆ្នាំ។
ឯកឧត្តម ស៊ុន ចាន់ថុល បានបង្ហាញក្តីរំពឹងថាផ្លូវល្បឿនលឿនភ្នំពេញ-ព្រះសីហនុនេះ នឹងដើរតួនាទីយ៉ាងសំខាន់ក្នុងការដឹកជញ្ជូនទំនិញតំបន់ប៉ូលសេដ្ឋកិច្ចដ៏សំខាន់ពីរគឺរាជធានីភ្នំពេញ និងខេត្តព្រះសីហនុ។ ជាពិសេសការដឹកទំនិញពីបណ្តារោងចក្រនានាទៅកាន់កំពង់ផែស្វយ័តព្រះសីហនុ សម្រាប់ការនាំចេញទៅកាន់ប្រទេស ក៏ដូចជាការដឹកទំនិញពីកំពង់ផែស្វយ័តព្រះសីហនុទៅតំបន់ដទៃទៀត។
ប្រមុខរាជរដ្ឋាភិបាល បានជឿជាក់ថា ផ្លូវល្បឿនលឿនមួយខ្សែនេះ នឹងរួមចំណែក កាន់តែខ្លាំងបន្ថែមទៀត ក្នុងការជំរុញសេដ្ឋកិច្ចរបស់កម្ពុជា អោយកាន់តែរីកចំរើនមួយកំរិតទៀត ក្រោយសាងសង់រួចរាល់ ៕
