អគ្គីភ័យឆេះតូបលក់អីវ៉ាន់ចាប់ហួយនៅក្នុងផ្សារតាសេក ខណ្ឌពោធិ៏សែនជ័យអស់៨តូប
ភ្នំពេញ ៖ អគ្គិភ័យមួយបានឆាបឆេះតូបលក់អីវ៉ាន់ចាប់ហួយមួយកន្លែងនៅក្នុងផ្សារតាសេក បង្កការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ច មូលដ្ឋាន បានហៅរថយន្តពន្លត់អគ្គិភ័យ មកជួយអន្តរាគមន៍បាញ់ពន្លត់
គ្រោះអគ្គិភ័យនេះបានកើតឡើងនៅវេលាម៉ោង១១និង៤០នាទីយប់ ថ្ងៃទី៦ ខែមិនា ឆ្នាំ២០១៩ នៅចំណុចតូបលក់អីវ៉ាន់ចាប់ហួយ ក្នុងបរិវេណផ្សារតាសេក ស្ថិតក្នុង ភូមិតាសេក សង្កាត់កំបូល ខណ្ឌពោធិ៏សែនជ័យ រាជធានីភ្នំពេញ ។
បើតាមសាក្សីដែលឃើញហេតុការណ៍បានប្រាប់ឲ្យដឹងថា នៅមុនពេលកើតហេតុ គេបានឃើញមានផ្សែងហុយចេញពីខាងក្នុងតូបលក់អីវ៉ាន់ចាប់ហួយក្នុងផ្សារនិងលាយឡំអណ្តាត់ភ្លើងទេីប នាំគ្នាស្រែកឆោឡោរឡើង និងបានរាយការណ៍ប្រាប់សមត្ថកិច្ចមូលដ្ឋាន មកពិនិត្យមេីលជាក់ស្ដែង ។ បន្ទាប់ពីទទួលបានដំណឹងនេះភ្លាមកម្លាំង សមត្ថកិច្ចបានទាក់ទងកម្លាំងអន្តរាគមន៍រថយន្តពន្លត់អគ្គិភ័យមកជួយបាញ់ពន្លត់ភ្លាមៗផងដែរ ។
ចំពោះមូលហេតុគេសង្ស័យទុស្សេខ្សែភ្លេីង ទើបបណ្ដាលឲ្យឆេះរាលដាលឡេីង និងខូចខាតសំភារៈ តូបលក់អីវ៉ាន់ចាប់ហួយចំនួន ៨តូប ។
ប្រតិបត្តិការពន្លត់អគ្គិភ័យខាងលើនេះសមត្ថកិច្ចបានប្រើប្រាស់ រថយន្តពន្លត់អគ្គីភ័យចំនួន៤គ្រឿងបាញ់អស់ទាំង៤គ្រឿងទើបពន្លត់រលត់ទាំងស្រុង នៅម៉ោង១និង៣០នាទីយប់ រំលងអធ្រាត្រឈានចូលថ្ងៃទី៧ ខែឆ្នាំដដែល។ តាមសម្តីប្រជាពលរដ្ឋដែលរស់នៅជិតផ្សារខាងលើបានសណូមពរ ឲ្យលោកឧកញ៉ា ឌួង តេច ដែលជាម្ចាស់ផ្សារតាសេក ខាងលើឲ្យបើកផ្សារនេះឡើងវិញ ឲ្យប្រជាពលរដ្ឋបានលក់ដូរផង និងឲ្យមានសន្តិសុខយាមកាមបានល្អផង កុំទុកចោលអាណាធិបតេយ្យបែបនេះ មានប្រជាពលរដ្ឋ២ទៅ៣តូបដែលមកលក់អីវ៉ាន់ចាប់ហួយហើយក៏ចាក់សោរចោល បង្កឲ្យមានអគ្គីសភ័យឆាបឆេះដូច្នេះ ៕
