ផ្ទះជនជាតិចិន ស្តុបគ្រឿងអគ្គីសនីចាក់សោរម្ចាស់មិននៅឆ្លងចរន្តអគ្គិសនីឆាបឆេះបំផ្លាញទ្រព្យសម្បត្តិមួយចំនួនធំ
ភ្នំពេញ៖ ផ្ទះស្តុបគ្រឿងអគ្គីសនី របស់ជនជាតិចិន មួយកន្លែងនៅជាន់ទី១ត្រូវបានអគ្គិភ័យឆាបឆេះសន្ធោសន្ធៅ បន្ទាប់ពីឆ្លងចរន្តអគ្គិសនី
ហេតុការណ៍នេះបានបង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្តពន្លត់អគ្គីភ័យ មកជួយអន្តរាគមន៍ បាញ់ពន្លត់កាលពីវេលាម៉ោង៩យប់ថ្ងៃទី១១ខែមិនាឆ្នាំ២០១៩ នៅចំណុចផ្ទះលេខ២៩BA ផ្លូវលេខ៣៤៨សង្កាត់បឹងកេងកងទី៣ ខណ្ឌចំការមន រាជធានីភ្នំពេញ។
យោងតាមប្រពភព័ត៌មានពីប្រជាពលរដ្ឋដែលរស់នៅក្បែរផ្ទះកេីតហេតុបានរៀបរាប់ប្រាប់ឲ្យដឹងថានៅមុនពេលកើត ហេតុ ពួកគាត់៥ទៅ៦នាក់បានឃើញផ្សែងហ៊ុយចេញពីផ្ទះជាន់ទី១របស់ជនជាតិចិន២នាក់ប្ដីប្រពន្ធដែលស្តុបគ្រឿងអគ្គីសនី ចាក់សោរចោលម្ចាស់មិននៅ ខណៈពេលនោះក៏មានអណ្តាតភ្លើងឆេះចេញយ៉ាងសន្ធោសន្ធៅ និងមានឮសំលេងផ្ទុះ កន្លែងស្តុបអីវ៉ាន់សម្រាប់លក់។ បន្ទាប់មកពួកគាត់ក៏បានស្រែកឆោឡោឡេីង បង្កការភ្ញាក់ផ្អើលយ៉ាងខ្លាំង។ ភ្លាមៗនោះពួកគាត់ក៏ប្រញាប់ប្រញាល់នាំគ្នាដួសទឹកជះពន្លត់ តែមិនរលត់ក៏ប្រញាប់រាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គីភ័យអោយចុះមកអន្តរាគមន៍បាញ់ពន្លត់។
ប្រភពដដែលបន្តថា បន្ទាប់មកក៏មានសមត្ថកិច្ចមូលដ្ឋាន រួមទាំងរថយន្តពន្លត់អគ្គីភ័យបានចុះមកជួយអន្តរាគមន៍បាញ់ពន្លត់ប៉ុន្តែដោយសារផ្ទះកើតហេតុជាផ្ទះដែលស្តុបអីវ៉ាន់សម្រាប់លក់ពេញណែន មានទាំងជ័រ ក្រដាស់ឡាំ និងសម្ភារៈ អគ្គីសនីផ្សេងៗជាច្រើនទៀត ទេីបធ្វេីឲ្យពិបាកដល់ការអន្តរាគមន៍បាញ់ទឹកពន្លត់ បន្ទាប់ពីធ្វេីការបាញ់ទឹកពន្លត់អស់រយៈពេលប្រមាណជាង២ម៉ោងក្រោយមក ទេីបភ្លេីងបានរលត់ទៅវិញជាស្ថាពរនៅម៉ោង១១និង៣០ នាទីយប់ថ្ងៃខែ ឆ្នាំដដែល ដោយប្រេីប្រាស់រថយន្តពន្លត់អគ្គីភ័យអស់ចំនួន២៤គ្រឿង។
បេីតាមប្រភពពីសមត្ថកិច្ចមូលដ្ឋានបានប្រាប់ឲ្យថា ភ្លើងកំពង់តែឆាបឆេះក៏ស្រាប់តែឃើញពីនាក់ប្តីប្រពន្ធ ជាជនជាតិចិនមកដល់កន្លែងកើតហេតុ ហើយត្រូវបានសមត្ថកិច្ចនាំខ្លួនយក ទៅប៉ុស្តិ៏នគរបាលរដ្ឋបាលបឹងកេងកងទី៣ ដើម្បីសួរនាំ ។ សមត្ថកិច្ចបន្ថែមទៀតថា ករណីអគ្គីភ័យខាងលេីនេះមិនបានបង្កអោយឆេះរាលដាលដល់ផ្ទះអ្នកជិតខាងនោះទេ គ្រាន់តែរោលផ្សែងខ្មៅតែប៉ុណ្ណោះគឺខូតខាតតែសម្ភារៈ គ្រឿងអគ្គីសនីសម្រាប់លក់មួយចំនួនធំ ដែលនៅក្នុងផ្ទះ មានទំហំ៤ម៉ែត្រគុណ១៦ម៉ែត្រ ជាប្រភេទផ្ទះថ្មល្វែង ។ ត្រូវឆេះខូចខាតអស់ទាំងស្រុង ចំពោះមូលហេតុគឺបណ្តាលមកពីឆ្លងចរន្តអគ្គិសនី(ផ្ទុះស៊េខ្សែភ្លើង)៕
