បាញ់២គ្រាប់បង្កការភ្ញាក់ផ្អើលរួចជិះម៉ូតូគេចខ្លួនបាត់
ភ្នំពេញ៖ ជនសង្ស័យមិនស្គាល់អត្ថសញ្ញាណ២នាក់ បានដកកាំភ្លើងខ្លីបាញ់ថ្នល់កៅស៊ូ ២គ្រាប់រួចជិះម៉ូតូគេចខ្លួនបាត់
ហេតុការណ៍នេះបានបង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចកាលពីវេលាម៉ោង០៩និង២០នាទីយប់ថ្ងៃទី១៩ខែមិនាឆ្នាំ២០១៩ នៅតាមបណ្ដោយផ្លូវ២៧៦ កែងនិងផ្លូវ១៤៣ ក្នុងសង្កាត់អូឡាំពិច ខណ្ឌចំការមន។
យោងតាមប្រភពពីប្រជាពលរដ្ឋដែលឃើញហេតុការណ៍បានឲ្យដឹងថា មុនពេលកើតហេតុគេឃើញបុរស២នាក់ជិះម៉ូតូមួយគ្រឿងមិនចាំម៉ាកឌុបគ្នាធ្វើដំណើតាមបណ្តោយផ្លូវលេខ២៧៦ ទិសដៅពីលិចទៅកើត ខណៈមកដល់ចំណុចកើតហេតុខាងលើមិនដឹងជាមានរឿងអ្វីនោះទេ ក៏បានដកកាំភ្លើងខ្លីមួយដើមមិនស្គាល់ម៉ាកបាញ់ថ្នល់ចំនួន២គ្រាប់ រួចជិះម៉ូតូគេចខ្លួនចេញពីកន្លែងកើតហេតុបាត់ស្រមោល ធ្វើឲ្យមានភ្ញាក់ផ្អើល់ដល់ប្រជាពលរដ្ឋដែលនៅក្បែរនិងអ្នកធ្វើដំណើរតាមផ្លូវយ៉ាងខ្លាំង ។
ក្រោយពេលកើតហេតុសមត្ថកិច្ចមូលដ្ឋានបានចុះមកកន្លែងកើតហេតុរួចរើសយកសំបកគ្រាប់ទៅរក្សាទុកនៅប៉ុស្តិ៍នគរបាលសង្កាត់អូឡាំពិច ដើម្បីទុកធ្វើជាវត្ថុតាងធ្វើការស្រាវជ្រាវរកមុខជនបាញ់បោះសេរីបង្កការភ្ញាក់ផ្អើលយកមកផ្តន្ទាទោទៅតាមផ្លូវច្បាប់៕
