ទីបំផុត! មន្ត្រីអាវុធហត្ថជើងខ្លាំងពាក់ស័ក្តិ៤សាន្ត សុខុម ត្រូវបានឪពុកនាំខ្លួនចូលមកដោះស្រាយបញ្ហា
កំពង់ចាម៖ មន្រ្តីអាវុធហត្ថម្នាក់ជាកូនប្រុសមេPMខេត្តក្រចេះដែលអំពើហឹង្សាវៃយុវជន២នាក់រួចដកកាំភ្លើងភ្ជង់ទីបំផុតបាន ចូលខ្លួនទៅទីបញ្ជាការដ្ឋានអាវុធហត្ថខេត្តកំពង់ចាមហើយនៅរសៀលថ្ងៃទី២៥ខែមីនាឆ្នាំ២០១៩នេះដើម្បីទទួលទោសទន់របស់ខ្លួននៅចំពោះមុខសមត្ថកិច្ច ពាក់ព័ន្ធនិងករណីវាយ និងដកកាំភ្លើងភ្ជង់យុវជន២នាក់ នៅក្នុងហាងអ៊ីនធឺណេតមួយកន្លែង នាទីរួមខេត្តកំពង់ចាម។
បើតាមមន្រ្តីអាវុធហត្ថខេត្តកំពង់ចាមបានឲ្យបណ្តាញព័ត៌មាន ដឹងនៅរសៀលថ្ងៃទី២៥ខែមិនានេះថាមន្រ្តីអាវុធហត្ថឈ្មោះ សាន្ត សុខុម បានចូលខ្លួនទទួលទោសតាមកំហុសដែលបានប្រព្រឹត្តទៅលើយុវជនទាំង២នាក់ ។ ប្រភពដដែលបានបន្តថា
លោកឧត្តមសេនីយ៍ត្រី សាន្ត ប៊ុនថាន នាំកូនប្រុសរបស់ខ្លួន មកប្រគល់ជូនអាវុធហត្ថខេត្តកំពង់ចាម ដើម្បី ទទួលទោស កំហុសដែលបានប្រព្រឹត្ត។ បន្ទាប់ពី សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ព្រមានថាមេPMខេត្តក្រចេះត្រូវនាំកូនប្រុសចូលខ្លួនដោះស្រាយបញ្ហា បើមិនដូច្នេះទេប្រឈមមុខនិងបាត់បង់តំណែង តួនាទីរបស់ខ្លួន ។
គួរំលឹកថា កាលពីថ្ងៃទី១៩ ខែមីនា ឆ្នាំ២០១៩កន្លងទៅកូនប្រុសលោកឧត្តមសេនីយ៍ត្រី សាន្ត ប៊ុនថាន គឺលោក សាន្ត សុខុម ដែលជាមន្ត្រីអាវុធហត្ថខេត្តក្រចេះពាក់ស័ក្តិ៤ បានប្រើហិង្សាដោយដាល់ និងឡើងជង្គង់ព្រមទាំងដកកាំភ្លើងភ្ជង់ទៅលើយុវជនពីរនាក់នៅកន្លែងលេងអ៉ីនធើណេតមួយកន្លែងក្នុងខេត្តកំពង់ចាម។
បន្ទាប់ពីទទួលបណ្តឹងពីយុវជនរងគ្រោះឈ្មោះ វ៉ាន់ ចាន់អទិច្ចបញ្ញា និងឈ្មោះ យ៉េ ចិន្តា រួចមកលោក ហាក់ ហ៊ន់ តំណាង អយ្យការអមសាលាដំបូងខេត្តកំពង់ចាម នៅថ្ងៃទី២៤ ខែមីនា ឆ្នាំ២០១៩ ក៏បានចេញដីកាបញ្ជាឲ្យកូនប្រុសមេបញ្ជាការអាវុធហត្ថខេត្តក្រចេះឈ្មោះ សាន្ត សុខុម ចូលខ្លួននៅមុខអយ្យការឲ្យបានមុនថ្ងៃទី២៦ ខែមេសា ឆ្នាំ២០១៩ ដើម្បីដោះស្រាយបញ្ហាប្រើអំពើហិង្សានេះ។
លោកឧត្តមសេនីយ៍ត្រី សាន្ត ប៊ុនថាន ជាឪពុករបស់ជនបង្កអំពើហិង្សា បានបញ្ជាក់ថា អំពើហិង្សានេះបានផ្តើមចេញពីកូនប្រុសរបស់លោកម្នាក់ទៀតឈ្មោះ សាន្ត សុវិជ្ជា ដែលត្រូវជាប្អូនរបស់សាន សុខុម ។ លោកឧត្តមសេនីយ៍ត្រីបានបន្តថា កូនប្រុសរបស់លោកឈ្មោះ សាន្ត សុវិជ្ជា រួមជាមួយមិត្តិភក្តិ បានលេងល្បែងចាញ់អស់លុយរហូតយកខ្សែក និងម៉ូតូទៅបញ្ចាំគ្មានសល់ បន្ទាប់ពីទទួលបានព័ត៌មានបែបនេះ លោកបានឲ្យកូនបងឈ្មោះ សាន្ត សុខុម ទៅតាមរកប្អូន និងសួរនាំកន្លែងបញ្ចាំខ្សែក និងម៉ូតូ ដើម្បីលោះ យកមកវិញ។ ប៉ុន្តែពេលទៅដល់ហាងអ៉ិនធើណេត ក៏ជួបមិត្តភក្តិរបស់ឈ្មោះ សាន្ត សុវិជ្ជា ហើយក៏សួរនាំរកទីតាំងបញ្ចាំ។ ដោយសារមិត្តភក្តិរបស់ប្អូនប្រុសខ្លួនមិនប្រាប់ និងមិននាំទៅកន្លែងបញ្ចាំ ដើម្បីលោះយកទ្រព្យសម្បត្តិមកវិញនោះ ក៏កើតមានជម្លោះរហូតវាយ និងដាក់កាំភ្លើងភ្ជង់តែម្តង៕
