ឆ្លងចរន្តអគ្គីសនី ឆេះធនាគា និងហាងpizza របួសធ្ងន់ម្ដាយនិងកូនប្រុស
ភ្នំពេញ៖ ឆ្លងចរន្តអគ្គីសនីឆេះធនាគាអេស៊ា ផេស៉ីហ្វិក ហ្វាយនែន ភីអិលស៉ី រាលដាល ដល់ហាងpizza និងបន្តឆេះ បង្គោលភ្លើងបន្ថែមទៀត បណ្ដាលឲ្យស្ត្រីម្នាក់និងក្មេងប្រុសម្នាក់ទៀតរងបួសសន្លប់បាត់ស្មារតី
ហេតុការណ៍គួរឲ្យរន្ធត់នេះបង្កការភ្ញាក់ផ្អើលកាលពីវេលាម៉ោង១និង២០ នាទីរសៀលថ្ងៃទី២២ ខែមេសា ឆ្នាំ២០១៩ នៅចំណុច ធនាគាអេស៊ា ផេស៉ីហ្វិក ហ្វាយនែន ភីអិលស៉ីនិងហាង Domino Pizza ទល់មុខផ្សារ ធីខេ នៅតាមបណ្ដោយផ្លូវលេខ ២៨៩កែងផ្លូវលេខ៥១៦ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានអោយដឹងថា នៅមុនពេលកើតហេតុគេឃើញមានផ្សែងចេញពីធនាគា អេស៊ា ផេស៉ីហ្វិក ហ្វាយនែន ភីអិលស៉ី រួចរាលដាលដល់ហាងpizza និងបន្តឆេះបង្គោលភ្លើងបន្ថែមទៀត។ នៅក្នុងប្រតិបត្តិការនេះ កម្លាំងនគរបាលបានចុះជួយអន្តរាគមន៍ភ្លាមៗនិងទាក់ទងរថយន្តពន្លត់អគ្គិភ័យជាច្រើនគ្រឿងមកជួយបាញ់ពន្លត់។ តែគួរឲ្យរន្ធត់ ដែលនៅក្នុងករណី នោះ បង្កការភ្ញាក់ផ្អើលដែលស្ត្រីនិងកូនប្រុសម្នាក់ជាប់នៅក្នុងធនាគា ដែលជាប្រពន្ធនិងកូនរបស់សន្តិសុខប្រចាំនៅធនាគា ធ្វើអោយសន្លប់បាត់ស្មារតី ត្រូវបានកម្លាំងនគរបាលជំនាញជួយសង្គ្រោះបានភ្លាមៗរួចបញ្ជូនតាមរយៈម៉ូតូទៅមន្ទីរពេទ្យតែម្ដង។
សូមបញ្ជាក់ផងដែរ ក្នុងប្រតិបត្តិការនេះ រថយន្តពន្លត់អគ្គិភ័យ បានមកដល់កន្លែងកើតហេតុចំនួន១៨គ្រឿង រួមមានរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន១២គ្រឿង ក្រុមហ៊ុន OCICចំនួន៥គ្រឿង និងក្រុមហ៊ុនCambodia ១គ្រឿង ប្រើប្រាស់បាញ់ពន្លត់អស់រថយន្ត ៨គ្រឿង។ ចំណែកធនាគានិងហាងខូចខាតតែគ្រឿងតុបតែងខាងក្រៅនិងម៉ាស៉ីនត្រជាក់បន្តិចបន្តួចប៉ុណ្ណោះមិនបង្កអោយ ខូចខាតដល់ខាងក្នុងធនាគានិងហាងឡើយ៕
