ប្រុសព្រានបោកយកលុយនិងខ្លួនប្រាណរួចដាក់មេប្រូចបាត់
ប្បន្ទាយមានជ័យ ៖ នារីម្នាក់ត្រូវបានប្រុសស្នេហ៍បោកយកខ្លួន និងប្រាក់ រួចគេចខ្លួនប្រុច បន្ទាប់ពីចូលផ្ទះសំណាក់ ដេករួម រស់នៅជាមួយគ្នាច្រើនយប់
ហេតុការណ៍បង្កការភ្ញាក់ផ្អើលនេះកើតឡើងកាលពីថ្ងៃទី២៨ ឧសភា ឆ្នាំ២០១៨ ស្ថិតនៅក្រុងប៉ោយប៉ែតខេត្តបន្ទាយមានជ័យ ។
នារីរងគ្រោះឈ្មោះឡត មុំ អាយុ៣៧ឆ្នាំ មេម៉ាយកូន២ មានទីលំនៅក្នុងភូមិលាបទង ឃុំទ្រា ស្រុកស្ទោង ខេត្តកំពង់ធំ ។បើតាមសម្តីស្ត្រីរងគ្រោះបានរៀបរាប់ថា នាងមានទំនាក់ ទំនងស្នេហ៍ជាមួយបុរសម្នាក់តាមហ្វេសប៊ុកជាភាសាថៃឈ្មោះវ៉ាន់ រយៈពេលជិត១ខែមកហើយ ដោយបានលួងលោមនាងកុហកថា គេជាបុរសពោះម៉ាយ និងសុំយកនាងធ្វើជាប្រពន្ធ ហើយបានបបួលនាងទៅធ្វើការនៅប្រទេសថៃ ឱ្យនាងរកប្រាក់១ម៉ឺនបាត ធ្វើលិខិតឆ្លងដែន ខ្វះប៉ុន្មានគេជាអ្នកជួយចេញ ។ លុះនាងធ្វើដំណើរមកដល់ក្រុងប៉ោយប៉ែតជួបគ្នា ប្រុសព្រានក៏នាំនាងឡើងផ្ទះសំណាក់ រស់នៅជុំគ្នាដូចប្តី-ប្រពន្ធ ។ក្រោយពីបុរសនោះ ទទួលប្រាក់ចំនួន១ម៉ឺនបាតរួច បែរជាគេថា សាច់ញាតិគេក៏ត្រូវទៅធ្វើការនៅស្រុកថៃដែរ ហើយកុហកថាខ្វះប្រាក់ នាងក៏ទាក់ទងទៅស្រុកឱ្យម្តាយចងការប្រាក់អ្នកជិតខាងវេរឱ្យបន្ថែមចំនួន៣លានរៀលទៀត ។នាងបន្តទៀតថា ការរត់ការឯកសារ ដើម្បីធ្វើលិខិតឆ្លងដែនដំបូង ធ្វើតែ២ថ្ងៃបានហើយ ដឹងអីនាងមកស្នាក់នៅក្នុងក្រុងប៉ោយប៉ែតជាច្រើនយប់ ហើយមិនទាន់បានសួរសុំលុយវិញ ដើម្បីធ្វើដំណើរវិលត្រឡប់ទៅស្រុក ស្រាប់តែនៅព្រឹកថ្ងៃទី២៨ ឧសភា នាងរវល់ងូតទឹកចេញមកវិញ ស្រាប់តែបាត់ប្រុសស្នេហ៍ និងកាបូបខោអាវរបស់នាងពីបន្ទប់ផ្ទះសំណាក់អស់ និងគេចខ្លួនទៅបាត់ ប៉ុន្តែទូរស័ព្ទនៅទាក់ទងបាននៅពេលនាងសួរតាមទូរស័ព្ទគេប្រាប់ឱ្យនាងទៅអង្គុយរងចាំនៅក្នុងបរិវេណវត្តបាលិលេយ្យ គេទៅដកប្រាក់ឲ្យវិញ។ ទីបំផុត ប្រុសព្រានដែលនាងសង្ស័យថា បោកប្រាស់នាងមែន គឺហ្វេសប៊ុករបស់គេដែលធ្លាប់លេងជុំគ្នាក៏បិទ ឯលេខទូរស័ព្ទដែលទំនាក់ទំនងនោះ ក៏មិនអាចទាក់ទងបាន។យ៉ាងណាក៏ដោយ ជុំវិញករណីនេះគេឃើញនគរបាលប៉ុស្តិ៍រដ្ឋបាលសង្កាត់ប៉ោប៉ែត បានដឹកនាងតាមម៉ូតូទៅកាន់ផ្ទះសំណាក់ស្ទឹងមាស ដែលជាប់ដងផ្លូវជាតិលេខ៥ ក្នុងភូមិក្បាលស្ពាន០១ សង្កាត់ប៉ោយប៉ែត ដើម្បីសុំឆែកកាមេរ៉ាសុវត្ថិភាព ដើម្បីរកមុខសញ្ញាជនសង្ស័យ។ នៅក្នុងកាមេរ៉ាសុវត្ថិភាពរបស់ផ្ទះសំណាក់ស្ទឹងមាស គេឃើញរូបប្រុសព្រានខាងលើ កាន់កាបូបខោអាវរបស់ស្ត្រីរងគ្រោះមកទុកចោលខាងក្រោមរួចគេចខ្លួនទៅបាត់ ៕
