រថយន្តសាំយ៉ុងសាករបាំងថ្មចែកទ្រូងផ្លូវមុខស្ថានទូតវៀតណាមខ្ទេចមុខ
ភ្នំពេញ៖ បុរសម្នាក់សង្ស័យងងុយដេក បានបើករថយន្តសាំយ៉ុងដឹកទំនិញពេញរថយន្ត ជ្រុលទៅបុករបាំងថ្មពុះចែកទ្រូងផ្លូវមុខស្ថានទូតវៀតណាម បណ្ដាលឲ្យបាក់ខ្ទេច២កង់ ឯរថយន្តបង្ករងការខូចខាតយ៉ាងដំណំ ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៣និង៣០នាទីទាបភ្លឺថ្ងៃទី២៤ខែមេសាឆ្នាំ២០១៩ នៅមុខស្ថានទូតវៀតណាម តាមបណ្ដោយផ្លូវព្រះមុន្នីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា ដំបូងគេឃើញរថយន្តបង្កម៉ាកសាំងយ៉ុង ពណ៌ស ពាក់ស្លាកលេខភ្នំពេញ 2Y-2027 បើកបរដោយបុរសម្នាក់ បានធ្វើដំណើរតាមបណ្ដោយផ្លូវព្រះមុន្នីវង្សទិសដៅពីជើងទៅត្បូងក្នុងល្បឿនយ៉ាងលឿនហើយ សង្ស័យតែតៃកុងងងុយដេកផងនោះ ក៏បានជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យបាក់បែកអស់ចំនួន២កង់ ចំណែករថយន្តបង្កវិញ បានរងការខូចខាតផ្នែកខាងមុខយ៉ាងដំណំផងដែរ ។ សំណាងមិនបណ្ដាលឲ្យតៃកុងរថយន្តបង្ក និងបងប្អូនប្រជាពលរដ្ឋដែលបានធ្វើដំណើរឆ្លងកាត់ រងរបួសនោះឡើយ ។បន្ទាប់ពីកើតហេតុភ្លាមៗ តៃកុងរថយន្តបង្កមានការភិតភ័យពេកក៏ចុះគេចខ្លួនបាត់ស្រមោល ។
ក្រោយមកសមត្ថកិច្ចមូលដ្ឋានបានចុះមកដល់រួចទាក់ទងទៅសមត្ថកិច្ចជំនាញចរាចរណ៍ឲ្យមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់ ៕
